Verum öflugust í sumar!

Stelpur úr 5. kv síðasta sumar.

Boltinn er byrjaður að rúlla hjá eldri flokkum félagsins á Íslandsmótinu og styttist í að allt fari á fullt í sumar hjá þeim yngri. Þátttaka foreldra skiptir miklu máli til að gera sumarið sem ánægjulegast í KA.

Í sumar mun KA spila  tæplega 400 leiki á vegum KSÍ ásamt mörgum helgarmótum þar sem mörg lið frá KA verða á hverju móti. Má þar nefna að KA verður eitt fjölmennasta félagið á Símamótinu en 16 lið eru skráð frá okkur og þá má reikna með að enn fleiri lið fara á Króksmótið frá KA í ágúst. Það stefnir því í viðburðaríkt og skemmtilegt fótboltasumar hjá KA!

Til að sumarið verði sem ánægjulegast er mikilvægt að þjálfarar, iðkendur og foreldrar séu með það markmið að verða sem öflugust í sumar.

Þjálfararnir eru að vinna mjög gott starf með það markmið að hjálpa iðkendum að verða öflugri einstaklingar sem og að búa til liðsheild í hverju liði.

Iðkendur hafa margir hverjir verið duglegir í vetur og eru tilbúnir í sumarið sem er hálfgerð uppskeruhátíð fyrir þau. Ef eitt er víst og það er það að þeir ætla heldur betur að gera sitt besta í sumar.

Foreldrar eru starfinu ótrúlega mikilvægir. Það er frábært fólk sem eru í yngriflokkaráði og foreldraráðum sem skipuleggja í samráði við þjálfara mót og viðburði. Liðstjórar standa vaktina og sjá til þess að allt fari vel á mótunum. Þetta skiptir máli og eiga margir foreldrar í starfinu hrós skilið fyrir sitt framlag.

Til að KA foreldrarnir verði þeir öflugustu í sumar skora ég því á KA foreldra að…

• Sýna fótboltanum áhuga með mætingu á mót, leiki og æfingar.
• Spyrja um líðan og frammistöðu en ekki bara niðurstöðu/úrslit
• Styðja og hvetja liðið en ekki bara þitt barn.
• Vera jákvæð, bæði þegar vel gengur og illa.
• Taka þátt í starfinu sem liðstjóri eða sjálfboðaliði.

Að lokum eru hér þrjú málefni sem geta skemmt fyrir okkur og þá sérstaklega þegar kappið er of mikið. Sem betur fer er þetta undantekning en þó alltaf gott að minna á reglulega.

Hafa ber hugfast að leikur í yngri flokkum KA er ekki leikur í úrslitakeppni HM. Hvort dómarinn dæmir alltaf rétt eða ekki skiptir ekki alveg öllu máli. Dómarar í yngri flokkum eru oft ungir og óreyndir og því ekki uppbyggilegt að fullorðnir einstaklingar séu að öskra á hann. Sýnum dómaranum stuðning með góðum vinnufrið.

Eins er mikilvægt að foreldrar fari ekki í þjálfarahlutverkið og fari að kalla leiðbeiningar inn á völlinn. Leyfum iðkendum að prófa sig áfram, taka sjálfstæðar ákvarðanir, gera mistök og læra af þeim. Það er svo hlutverk þjálfarans að leiðbeina þeim þegar það á við.  Það er undantekning á þessu og það er þegar þjálfarar biðja vel valda foreldra að stjórna leikjum þegar leikjafjöldinn á mótum er svo mikill að þjálfarar ná ekki að stjórna öllum leikjum. 

Varðandi liðsval verður að hafa það í huga að það er ekki verið að velja lokahóp á EM. Það fá allir að keppa sem skiptir mestu máli. Þjálfarar hafa fylgst með iðkendum á mörgum æfingum, leikjum og mótum og velja liðin eins og þau passa best hverju sinni. Það að iðkandinn er ekki í liðinu fyrir ofan er því ekki að ástæðulausu. Oftast er því skýringin að það eru ótrúlega margir öflugir krakkar í KA eða þá að þjálfararnir meta sem svo að iðkandinn njóti sín betur í því liði sem þeir völdu hann. Fyrir þá kappsömustu verður að muna að þeir sem enda á að verða bestir á fullorðinsárunum eru þeir sem hafa mestan áhuga en ekki endilega þeir sem eru í einhverju ákveðnu liði í yngriflokkum. Það að iðkandinn lendi ekki með vinum sínum getur þýtt að hann kynnist öðrum iðkendum í KA betur. Það getur verið mjög þroskandi að stíga út fyrir þægindarammann. Þá má nefna að það eru mörg dæmi um að iðkendur eignist mjög góða vini eða vinkonur úr öðrum skólum en þau eru sjálf í.

Sjáumst hress og kát á KA-svæðinu í sumar og gerum þetta sumar að því besta hingað til.

Áfram KA!

- Aðalbjörn Hannesson, yfirþjálfari yngriflokka KA í knattspyrnu