Kynning á fyrirkomulagi sumarsins í 5. fl kk

Kæru foreldrar og iðkendur í 5. flokki karla

Við þjálfarar viljum hér kynna fyrir ykkur fyrirkomulag sumarsins varðandi Íslandsmótið. Það ber að taka það fram hér strax í byrjun að ákvörðunin um eftirfarandi fyrirkomulag er tekin að vel ígrunduðu máli og í samráði við yfirþjálfara yngriflokka hjá félaginu.

- Í ár munum við ekki gefa út liðaskipan sem gildir fyrir allt Íslandsmótið eins og það leggur sig, eins og hefur áður tíðkast.

- Í staðinn munum við gefa út liðskipan fyrir hvern leik fyrir sig.

Eins og með allar aðrar ákvarðanir okkar þjálfara, þá erum við hér að hugsa fyrst og fremst um það sem við teljum að sé okkar strákum fyrir bestu.

            - Nokkrir leikmenn hafa verið að berjast við meiðsli og einhverjir þeirra munu fyrir vikið ekki vera með frá byrjun Íslandsmótsins. Í staðinn munu þeir koma inn þegar að töluvert er liðið á mótið. Með þessu nýja fyrirkomulagi getum við komið þessum leikmönnum hægt og rólega inní það lið sem hæfir þeirra getustigi þegar að þeir eru orðnir heilir. Í staðinn fyrir að þurfa að byrja af spila af fullum krafti og ákefð í „sínu liði“ og eiga þar með meiri hættu á að meiðast strax aftur. Í þessu „sínu liði“ sem var ákveðið fyrir þá í byrjun sumars útfrá þeim forsendum sem áttu við þegar að liðin voru valin. Við teljum okkur ekki vera að græða neitt með því að láta leikmenn þjösnast í gegnum meiðslin sín til þess eins að spila með þeim strákum sem viðkomandi ætti að spila með miðað við fulla heilsu og 100% form. Þá veljum við frekar hinn kostinn að meta stöðu leikmanna miðað við hvernig hún er fyrir hvern leik.

            - Sumarið er langur tími og strákarnir á aldri þar sem þeir eru að taka miklum framförum á sínum knattspyrnuferli. Með þessu nýja fyrirkomulagi opnast möguleikinn á hreyfanleika milli liða. Leikmenn sem taka miklum framförum yfir sumarið eiga þannig möguleika á að spila sig upp um lið og styrkleika í staðinn fyrir að sitja fastir í sama liði allt sumarið. Þegar að við þjálfarar skiptum í lið eru margir þættir sem við vegum og metum t.d. vinnuframlag á æfingum, ástundun, frammistaða í leikjum og á æfingum, viðhorf og framkoma gagnvart liðsfélögum, þjálfurum og mótherjum svo eitthvað sé nefnt. Þetta eru allt þættir sem geta breyst yfir sumarið og því finnst okkur eðlilegast að geta vegið og metið þá reglulega yfir allt sumarið og leyfa þannig strákunum að njóta góðs af eigin frammistöðu og ástundun. 

            - Að auki hefur það áhrif á ákvörðun okkar að færri strákar eru skráðir til leiks fyrir sumarið en við gerðum ráð fyrir. Fyrir vikið verður erfitt að manna ákveðin lið. Með því að festa liðsskipan strax bjóðum við hættunni heim á að þurfa að berjast í bökkum með að ná nægum fjölda í sum lið en eiga á móti jafnvel nokkra varamenn í öðrum.

Þetta er fyrirkomulag sem við teljum að geti vel gengið upp, fyrir því eru dæmi. Til þess að þetta gangi upp þurfum við að treysta á gott samstarf okkar á milli. Árangur okkar liða gegnum árin í þessum aldursflokki er árangur þessa samstarfs og ofan á það viljum við að sjálfsögðu byggja og halda áfram.

Við eigum það sameiginlegt að bera hag strákanna fyrst og fremst fyrir brjósti. Þessvegna gengur þetta svona vel upp, því við erum í þessu af sömu ástæðu. Því setjum við allt uppá borðið og látum ykkur vita á hvaða rökum og forsendum þessi ákvörðun er byggð. Höldum áfram á réttri braut fyrir strákana, fyrir félagið og fyrir framtíðina!

Með bestu kveðju þjálfarar 5. Flokks karla hjá KA