Frí á fimmtudag - frítt á leikinn

Nú þurfa stelpurnar í Þór/KA á stuðningi okkar að halda sem aldrei fyrr. Við gefum því frí á æfingu á fimmtudaginn og mætum í staðinn á völlinn að styðja þær til sigurs. 

Kvennalið Þórs/KA leikur lokaleik sinn í Pepsi deildinni á fimmtudaginn þegar FH kemur í heimsókn. Það er hreinlega allt undir í leiknum en með sigri tryggja stelpurnar sér sjálfan Íslandsmeistaratitilinn. Leikurinn hefst klukkan 16:15 á Þórsvelli og viljum við sjá fulla stúku enda eiga stelpurnar það svo sannarlega skilið eftir frábært sumar.

Á sama tíma tekur Breiðablik á móti Grindavík en Breiðablik er tveimur stigum á eftir okkar liði í toppbaráttunni. Ef Breiðablik vinnur sinn leik og Þór/KA gerir jafntefli verða Blikar Íslandsmeistarar á betri markatölu. Það er því ljóst að okkar stelpur þurfa að einbeita sér að því að vinna FH og taka af allan vafa.

Þór/KA á frábæra styrktaraðila sem hafa séð til þess að það verður frítt á leikinn, fyllum stúkuna og fáum bikarinn heim, áfram Þór/KA!